|
Björgunarsveitin Kjölur
Þórnýjarbúð, Grundarholti, 116 Kjalarnesi
sími í húsi: 566-7557
bílasímar: Kjölur 1 853-5670, Kjölur 2 852-3303
bakvaktarsími: 616-8493
Starfið
Björgunarsveitin KJÖLUR er sú minnsta á
höfuðborgarsvæðinu, en heldur úti engu að síður mjög öflugri starfsemi. 12 manns
eru á útkallslista (2008). Hún sinnir útköllum og verkefnum á sjó og landi. Til
að mæta þeim verkum, hefur sveitin yfir að ráða nokkrum tækjakosti svo sem; Ford
Econoline, Nissan Patrol, Zodiac M4 slöngubát, 4 kajökum og fjórhjóli.
Sérstaða sveitarinnar er á sviði fyrstuhjálpar þar sem samstarfssamningur er í
gildi við Slökkvilið höfuðborgarsvæðisins síðan 2006. Samningurinn nær til
útkalla vegna alvarlega slysa og veikinda á Kjalarnesi og í Kjós.
Síðan um áramót 2006 hefur verið samstarf við Klébergsskóla um valáfanga í
unglingadeild. Á hverju skólaári hafa tveir hópar kynnt sér
björgunarsveitarstörf.
Unglingadeildin STORMUR var vakin aftur 2008 og eru 10 unglingar starfandi í
henni.
Saga slysavarna- og
björgunarstarfa á Kjalarnesi
Upphaf sögu slysavarna- og
björgunarstarfa á Kjalarnesi má rekja til stofnunar Slysavarnadeildar Kjalarness
þann 29. desember 1949. Deildin beitti sér strax fyrir því að fá fluglínutæki
frá SVFÍ og að hópur manna yrði tiltækur í björgunarstörf innan hreppsins. Auk
þess stóð deildin fyrir fræðslu um fyrstu hjálp, brunavarnir og barðist fyrir
því að koma símamálum Kjalnesinga í viðunandi horf. Mikill kraftur var í
deildinni strax í upphafi og nánast allir íbúar hreppsins félagsmenn, eða um 173
manns. Fyrsta stóra „útkall“ deildarinnar var björgun áhafnar og farþega þegar
Laxfoss strandaði við sunnanvert Kjalarnes árið 1952.
Starfsemin var lítil á árunum 1965-1975 og búnaður afar fábrotinn, eitt
fluglínutæki, fyrstu hjálparkassi og einar börur og auk þess dreifður um
hreppinn.
Árið 1975 varð
sjóslys í
Hofsvíkinni þegar trilla sökk og tveir menn fórust. Í kjölfarið var keyptur
slöngubátur, búnaður endurnýjaður og starfsemin rifin upp aftur. Deildin fékk
sína fyrstu aðstöðu í gömlu hænsnahúsi í Grundarhverfi, sem var á þeim tíma að
byggjast upp. Fór svo að björgunarsveitin efldist með nýju fólki og varð
slysavarnadeildinni yfirsterkari, þannig að leiðir skildu árið 1983 og lognaðist
slysavarnadeildin út af í kjölfarið.
Björgunarsveitin, sem fram að
því hafði verið nafnlaus, fékk nafnið Kjölur, sem dregið er af kjalarlagi
Kerhólakambs í Esjunni.
Unimog torfærubifreið var keypt árið 1983 og stuttu síðar eignaðist sveitin sinn
fyrsta almennilega fyrstu hjálpar búnað. Þegar nýtt áhaldahús hreppsins var
byggt við Grundarhverfi árið 1986 fékk sveitin inni í hluta hússins ásamt
slökkviliðinu. Þar hefur sveitin aðstöðu enn þann dag í dag. Starfsemin varð
fyrir miklu áfalli árið 1992 þegar áhaldahúsið og allur búnaður sveitarinnar
brann til kaldra kola. Þar á meðal nýr Ford Econoline sem hafði verið keyptur
hálfu ári áður. Með mikilli vinnu og aðstoð frá öðrum sveitum og nærsveitungum
tókst að gera sveitina útkallshæfa fljótlega aftur.
Á næstu árum eftir brunann var
talsverður kraftur í starfseminni, meðal annars stofnuð unglingadeild og um 25
manns á útkallslista.
Sveitin lá í dvala í nokkur ár í kringum aldamótin 2000 en síðustu árin hefur
verið góður skriður á henni, þótt aðeins séu um 12 manns á útkallslista.
Tækjakostur hefur verið bættur og aukinn og samanstendur af tveimur bifreiðum,
slöngubát, fjórhjóli og kajökum.
Frá 2006 hefur verið samstarf
við Klébergsskóla um valáfanga í björgunarsveitarstarfi á unglingastigi.
Unglingadeildin Stormur hefur verið ágætlega virk síðan 2008.
Árið 2006 var gerður
samstarfssamningur við Slökkvilið Höfuðborgarsvæðisins vegna slysa og
bráðaveikinda á Kjalarnesi og í Kjós. Því er sérhæfing sveitarinnar orðin nokkur
á sviði fyrstuhjálpar.
Útköllum hefur fjölgað jafnt og
þétt frá aldamótum og eru nú um 50 á ári. Jafnframt skipa slysavarnir ákveðinn
sess í starfi sveitarinnar líkt og í upphafi.
Markmið
Björgunarsveitarinnar Kjölur (pdf skjal)
Kynning (pps skjal
4.4 Mb)
|
